జనరల్ మెడిసిన్ లేదా ఇంటర్నల్ మెడిసిన్ అంటే వ్యాధులను గుర్తించి, చికిత్స చేయడంలో నిపుణత కలిగిన వైద్య విభాగం. ఈ డిపార్ట్ మెంటు డాక్టర్లు బిపి, షుగర్, జ్వరం, దగ్గు, జలుబు వంటి సాధారణ ఆరోగ్య సమస్యలతో పాటు గుండె, ఊపిరితిత్తులు, మూత్రపిండాలు, కాలేయం వంటి ముఖ్యమైన అవయవాల వ్యాధులను కూడా చూడగలరు. వీరు పేషెంట్లను సంపూర్ణంగా పరిశీలించి, అవసరమైన టెస్టులు, స్కాన్లు చేయించి, సరైన చికిత్సను నిర్ణయిస్తారు.
జనరల్ మెడిసిన్ డాక్టర్లు పేషెంట్ల ఆరోగ్యాన్ని పర్యవేక్షిస్తూ, వారికి అవసరమైన మందులు, జీవనశైలిలో మార్పులు, ఆహార నియమాలు వంటి వాటిని సిఫార్సు చేస్తారు. వ్యాధి నిర్ధారణ, ప్రాథమిక చికిత్స, అవసరమైతే వేర్వేరు విభాగాల స్పెషలిస్టు డాక్టర్లకు రిఫర్ చేయడం వీరి పని. వీరు ప్రతి రోగికి వ్యక్తిగతంగా సముచితమైన చికిత్సను అందిస్తారు, తద్వారా పేషెంట్ త్వరగా కోలుకోవడానికి సహాయపడతారు.
ఇతర డాక్టర్లు, స్పెషలిస్టులతో కలసి పని చేస్తూ, పేషెంట్ కి మెరుగైన ఆరోగ్య సంరక్షణ ఇవ్వడంలో జనరల్ మెడిసిన్ డాక్టర్లు ముఖ్యమైన పాత్ర పోషిస్తారు. వీరు ఆరోగ్య పరీక్షలు నిర్వహించడం, వ్యాధి నివారణ పథకాలు అమలు చేయడం, మరియు రోగుల ఆరోగ్యంపై అవగాహన కలిగించడం వంటి పనులు చేస్తారు. గతంలో ఫామిలీ డాక్టర్లు చేసిన పనినే అటువంటి విస్తృత పరిజ్ఞానం మరియు నైపుణ్యం కలిగిన జనరల్ మెడిసిన్ డాక్టర్లు చేస్తున్నారు.
